Items filtered by date: Saturday, 14 April 2018

ኢትዮጵያ የምትከተለው የመድበለ ፓርቲ ዲሞክራሲያዊ ስርዓት ነው።በዚህም የተነሳ በአገሪቱ ከ60 በላይ የፓለቲካ ፓርቲዎች በምርጫ ቦርድ ተመዝግበው በህጋዊና በሰላማዊ መንገድ እየተንቀሳቀሱ ይገኛሉ። እነዚህ የፖለቲካ ፓርቲዎች በአገሪቱ የዲሞክራሲን ስርዓት ከማጎልበት አኳያ ከፍተኛ ሚና መጫወት ቢችሉም በተለያዩ ምክንያቶች የሚፈለገውን ሚና እየተወጡ አይደሉም፡፡
በአገራችን ዲሞክራሲያዊ ስርዓት አለመጎልበት መንስኤ ዙሪያ ደግሞ መንግስትና ተፎካካሪ ፓርቲዎች አንዱ ሌላውን ጥፋተኛ ያደርጋል፡፡መንግስት በአገሪቱ ዲሞክራሲን ማስፈን የሕልውና ጉዳይ ስለሆነ ተፎካካሪ ፓርቲዎች በነጻነት እንዲንቀሳቀሱ የሚያስችል የመድበለ ፓርቲ የፖለቲካ ስርዓት ተፈጥሯል ቢልም በአንጻሩ ተፎካካሪ ፓርቲዎች የፖለቲካ ምህዳሩ ‹‹ጠቧል መፈናፈኛም አጥተናል››የሚል ሮሮ ሲያሰሙ ቆይተዋል፡፡
በቅርቡ ጠቅላይ ሚኒስትር ዶክተር አብይ በህዝብ ተወካዮች ምክር ቤት ጠቅላይ ሚኒስትር ሆነው መሰየማቸውን ተከትሎ ባደረጉት ንግግር ከዚህ በፊት የነበረውን ሁኔታ ለመለወጥ መንግስት እንደሚሰራ አመላክተዋል፡፡ ከኢህአዴግ ውጭ ያሉ ፓርቲዎችን እንደ ተቃዋሚ ሳይሆን እንደ ተፎካካሪ፣ እንደጠላት ሳይሆን እንደ ወንድም፣ አማራጭ ሃሳብ አለኝ ብሎ እንደመጣ አገሩን እንደሚወድ የዜጋ ስብስብ እንደሚታዩም ገልጸዋል። የተፎካካሪ ፓርቲ መሪዎችን ደግሞ አብሮነታችንንና ሰላማችንን አደጋ ላይ ከሚጥሉ፤ ብሔራዊ ጥቅሞቻችንንም አሳልፈው ከሚሰጡ የአስተሳሰብ መስመሮችን ወጥተው በአርቆ አስተዋይነትና ሀገራዊ ፍቅር፤ በሰጥቶ መቀበል መርህ የተሻለ የፖለቲካ ባህል ለመፍጠር መንግስት የሚያደርገውን ጥረት እንዲያግዙም ጥሪ አቅርበዋል፡፡
ይህን ተከትሎም የተለያዩ ተፎካካሪ ፓርቲዎች ጠቅላይ ሚኒስትር ዶክተር አብይ የፖለቲካ ምህዳሩን ለማስፋትና ከተፎካካሪ ፓርቲዎች ጋር ለመነጋገር የገቡትን ቃል የሚቀበሉትና ተፈጻሚ ለማድረግ የሚያደርጉትን ጥረትም ድጋፍ እንደሚያደርጉ በተለያየ መንገድ አሳውቀዋል፡፡ይህ መልካም ጅምር ነው፡፡በሃገር ጉዳይ ሁሉም የጋራ አመለካከት እንዲይዝ፣ልዩነትን በሰለጠነ መንገድ የማሥተናገድ ባሕል እንዲዳበር በር ይከፍታልና ተጠናክሮ መቀጠል አለበት፡፡
አገርን ዋና ማዕከል አድርጎ የተለያዩ ፍላጎቶችና ጥቅሞች ተቀራራቢ ወደ ሆነ ፍላጎትና ጥቅም ለመምጣት በመንግስት በኩል የውይይትና የክርክር መድረኮች በማዘጋጀት የዳበረ ዲሞክራሲን በአገር ደረጃ ለማምጣት ወሳኝ ነው፡፡ለዚህ ደግሞ በዋናነት መንግስት ከፍተኛውን ሚና መጫወት አለበት።
መንግስት የዲሞክራሲ ተቋማት በማጠናከርና ከተፎካካሪ ፓርቲዎች ጋር ውይይትና ክርክር በማካሄድ፣ በተመሳሳይ ተፎካካሪ ፓርቲዎችም በጣም ጽንፍ ከወጣ አቋም ወጥተው ልዩነታቸው እንደተጠበቀ ሆኖ አንድ በሚያደርጉ አገራዊ ጉዳዮች ላይ አብሮ መስራትን ቅድሚያ ሊሰጡ ይገባል፡፡ይህም የዲሞክራሲያዊ ስርዓቱን ለማጎልበትና መድበለ ፓርቲ ፖለቲካ ምህዳሩን ለማስፋት የሚያስችል ይሆናል።
ጠቅላይ ሚኒስተር ዶክተር አብይ አህመድ ሀሙስ ሚያዚያ 4 ቀን 2010 ዓ.ም ለተፎካካሪ የፖለቲካ ፓርቲዎች፣ለሲቪክ ማህበራት መሪዎች፣ለኪነጥበብ ባለሙያዎች፤ታዋቂ ግለሰቦችና ሌሎችም ጥሪ ለተደረገላቸው እንግዶች በብሄራዊ ቤተ መንግስት የእራት ግብዣ ባደረጉበት ንግግር ‹‹ኢትዮጵያ ጠንካራ ተፎካካሪ ፓርቲዎችን ከመቼውም ጊዜ በላይ በምትፈልግበት ምዕራፍ ላይ ትገኛለች፡፡ ተፎካካሪ የፖለቲካ ፓርቲዎች ራሳቸውን ለለውጥ ዝግጁ ማድረግ አለባቸው፡፡ከፓርቲ አጥር የሚሻገር የሰውነትና የኢትዮጵያዊነት ድልድይ ያስፈልገናል፡፡ ሁላችንም ትላንት ያለፍንበትን ምስቅልቅል ከመማሪያነት ባለፈ ላናስበው በመዝጋት ለተሻለች ነገ በጋራ ልንገነባ ይገባል›› ከተፎካካሪ የፖለቲካ ፓርቲዎች ጋር በጋራ ለመስራት መንግስት ያለውን ቁርጠኝነት አሳይተዋል፡፡
የዴሞክራሲ ግንባታ ካለ ፖለቲካ ፓርቲዎች ቀጥተኛ እና ሙሉ ተሳትፎ ሊሳካ ስለማይችል ተፎካካሪ የፖለቲካ ፓርቲዎች በሀገራዊ፣ፖለቲካዊና ማህበራዊ ጉዳዮቻችን ላይ የእኔነት ስሜት ኖሯቸው የበኩላቸውን አስተዋጽኦ ማድረግ ይጠበቅባቸዋል፡፡ሁሉም ፖለቲካ ፓርቲዎች ልዩነት ከአገር በላይ ስለማይሆን ልዩነት እንደተጠበቀ ሆኖ በተለያዩ የጋራ አገራዊ ጉዳዮች ላይ አብረው መስራት አለባቸው፡፡ ልዩነቶች ሲኖሩም ምክንያታዊ በሆነ መልኩ መፍታትና የማስተናገድ ዕድልን መፈጠር ይኖርባቸዋል፡፡ መቻቻልና ሰጥቶ የመቀበል መርህን በማጎልበት ለህዝብ ጥቅም ቅድሚያ መስጠት ተገቢ ነው፡፡
ለመድበለ ስርዓቱ መጎልበት ፓርቲዎች ያለባቸውን አገራዊና ህዝባዊ ኃላፊነት በአግባቡና በብቃት ለመወጣት ዝግጁና ቁርጠኛ መሆን ይኖርባቸዋል፡፡አሁን የተጀመረው በጎ ጅምር ዳር በማድረስ የህዝቡንም ሆነ የአገሪቱን ጥቅም ማስጠበቅ ይቻላል፡፡ ገዥው ሆነ ተፎካካሪ የፖለቲካ ፓርቲዎች በሰለጠነ የፖለቲካ መድረክ ያለመግባባቶችንና ልዩነቶችን ምክንያታዊ በሆነ መልኩ ማጥበብ ለአገር ሰላም፣ ዲሞክራሲና ልማት ግንባታ ወሳኝ ሚና መጫወት የነገ የቤት ስራቸው መሆን አለበት፡፡ምክንያቱም ያላቸው ልዩነት ከሃገር በላይ አይደለምና፡፡

Published in የእለቱ ዜና
Saturday, 14 April 2018 17:54

ጠንካራ የፖለቲካ ፓርቲ

የብዙዎችን ቀልብ ከሚስቡ ፍክክሮች መካከል የፖለቲካ ፓርቲዎች ውድድር በዓለም ወደር የማይገኝለት ሆኗል፡፡ እንደዚህ ዓይነት የሞቀ ፉክክር በኢትዮጵያ ከታዩባቸው ጊዜያት ውስጥ ደግሞ የ1997ቱ ምርጫ የማይዘነጋ ሆኖ አልፏል፡፡ ከዛን ጊዜ ወዲህ ፉክክሩ የህዝብን ቀልብ በመሳብ በኩል ሳይዋጣለት ዓመታት ተቆጥረዋል፡፡ የፖለቲካ ፓርቲዎች ፉክክር አስመልክቶ አጀንዳ የመሆኑም ጉዳይ ተቀዛቅዟል፡፡
በሠላማዊ የሥልጣን ሽግግሩ ግን የብዙዎችን ቀልብ በሳበው የጠቅላይ ሚኒስትር ዶክተር አቢይ አህመድ ንግግር በተላለፉ መልዕክቶች የፖለቲካ ፓርቲዎችን የተመለከተው ሃሳብ ተጠቃሽ ሆኗል፡፡ በአገሪቱ የሚንቀሳቀሱ የፖለቲካፓርቲዎች በአዲስ መንፈስና ጉዞ እንዲንቀሳቀሱ ደማቅ ጥሪ ቀርቦላቸዋል፡፡ አማራጭ ሃሳቦችን በመያዝ ለህዝብና ለአገር ልማት የመትጋት ግብዣ ተላልፎላቸዋል፡፡ መንግሥት የፖለቲካ ምህዳሩ እንዲሰፋ ፓርቲዎችን በንቃት የማሳተፍ ፅኑ ፍላጎት እንዳለው በአደባባይ ተነግሯል፡፡
ጠቅላይ ሚኒስትር ዶክተር አብይ «ከኢህአዴግ ውጪ ያሉ ፓርቲዎችን የምናይበት መነፅር እንደተቃዋሚ ሳይሆን እንደተፎካካሪ፣ እንደጠላት ሳይሆን እንደ ወንድም፣ አማራጭ ሃሳብ አለኝ ብሎ እንደመጣ አገሩን እንደሚወድ የዜጋ ስብስብ ነው» ማለታቸውን ተከትሎ ጠንካራ ተፎካካሪ የፖለቲካ ፓርቲ ይኖራል የሚል ተስፋን አጭሯል፡፡ በእርግጥ ጠንካራ ፖለቲካ ፓርቲ መገለጫ ምንድን ነው?
የወለጋ ዩኒቨርሲቲ መምህሩ አቶ ዳባ ዱቤ ‹‹ ህዝብን የሚጠቅም አጀንዳና ያንንም የሚያስፈፅም ስትራቴጂ ያለው ፓርቲ ጠንካራ ፓርቲ ነው›› ሲሉ፤ የወሎ ዩኒቨርሲቲ ፕሬዚዳንቱ ዶክተር አባተ ጌታሁን በበኩላቸው፤ አንድ ፓርቲ ዘመን ተሻጋሪ ትልቅ ራዕይ ያለው መሆን አለበት ይላሉ፡፡
እንደ ዶክተር አባተ ገለፃ፤ ፓርቲ ራዕዩን ለማስፈፀም የራሱ ደንብና ህግ ሊኖረው ይገባል፡፡ ህግ አውጪው፣ ህግ ተርጓሚውና ህግ አስፈፃሚው በነፃነት እንዲሰሩ ምቹ ሁኔታን መፍጠር ይጠበቅበታል፡፡ መገናኛ ብዙሃንን ጨምሮ የዴሞክራሲ ተቋማት በነፃነት እንዲሰሩ የሚፈቅድ፤ በህዝብ ፍላጎት የሚያምን፤ የሃሳብ የበላይነትን የሚቀበል መሆን አለበት፡፡ አንድ ፓርቲ ፖሊሲ ስላለው ብቻ ጠንካራ ነው ማለት አይቻልም፡፡ ፖሊሲው ሊተገበር የሚችልና የህዝብን ፍላጎት ማዕከል ያደረገ ከመሆኑም በላይ የማስፈፀሚያ ስትራቴጂ ሊኖረው ይገባል፡፡ ፖሊሲው ከህዝብ ጋር ያልተቆራኘለት ፓርቲ ጠንካራ አይደለም፡፡
‹‹አፄ ቴዎድሮስ ህገ መንግሥታዊ ሥርዓትን ለማስፈን ጥረት አድርገዋል፤ በታክስ እና በቤተክርስቲያን አስተዳደር ላይ ማሻሻያ አድርገዋል፡፡ ይህ ስህተት ላይሆን ይችላል፡፡ ነገር ግን በህዝቡ ተቀባይነት እንዳይኖራቸው አድርጓል፡፡ 100ሺ የነበረው የሠራዊታቸው ቁጥር ወደ 10ሺ አሽቆልቁሏል›› የሚሉት ዶክተር አባተ፤ ጠንካራ ፓርቲ ህዝብ የሚቀበለውንና ሊተገበር የሚችልን ፖሊሲ ማውጣት ያስፈልገዋል ብለዋል፡፡ ህዝቡ ፓርቲውን ካልተከተለውና ካልተቀበለው ምንም ያህል ፖሊሲና ስትራቴጂ ቢኖረው ጥንካሬው እንደሚጠፋ ይናገራሉ፡፡
በህዝብ ዘንድ ተቀባይነትን ለማግኘት ለሙያቸው ክብር የሚሰጡ ምሁራኖችና በተለያዩ ዘርፎች የተሰማሩ ባለሙያዎችን ቢያካትት ፓርቲው ይበልጥ ውጤታማ ሊሆን እንደሚችልም ዶክተር አባተ ይጠቁማሉ፡፡ ትልቅ ሃሳብ ይዞ መነሳት ሌላው የፓርቲ ጥንካሬ መሰረት መሆኑን አክለዋል፡፡ ‹‹ዓለምን እየመራ ያለው ሃሳብ (አይዲያ)›› በማለት፡፡
ጠንካራ ፓርቲ በህዝብ ተቀባይነት ያለው መሆን እንዳለበት የሚናገሩት የዲላ ዩኒቨርሲቲው መምህሩ አቶ ሙህዲንም የፓርቲው አባላት የእርስ በርስ ግንኙነትና ቁርጠኝነት የጠንካራ ፓርቲ መገለጫ ነው ይላሉ፡፡ ሁሉም የፓርቲው አባላት ተጨባጭ ግብ አስቀምጠው ለስኬቱ መንቀሳቀስ እንደሚኖርባቸው ያስረዳሉ፡፡
የአዲስ አበባ ዩኒቨርሲቲ መምህሩ ዶክተር ያዕቆብ አርሳኖ በበኩላቸው፤ ህዝባዊ መሰረት ያለው፣ ዴሞክራሲያዊ፣ የሌሎችን ሃሳብ የሚቀበል፣ የአገሪቷን ብሔራዊ ጥቅም አስጠብቆ ወደ ፊት የሚጓዝ ጠንካራ ፓርቲ መሆኑን ተናግረዋል፡፡ ‹‹በህዝብ ዘንድ ተቀባይነት የሌለው ፓርቲ መውደቁና መሞቱ አይቀርም›› ይላሉ፡፡ ተቀባይነትን ያገኘ ፓርቲ ‹‹የሃብት ችግር አያጋጥመውም፤ ህዝብ ይደግፈዋል፤ ያዋጣለታል፤ በስብሰባ ይሳተፍለታል›› በማለት የህዝብን ተቀባይነት ማግኘት ወሳኝ መሆኑን ይናገራሉ፡፡
የመዳ ወላቡ ዩኒቨርሲቲ መምህሩ ዶክተር ሃብታሙ ተካም ለፓርቲ የህዝብ ተቀባይነት ወሳኝ እንደሆነ ያሰምሩበታል፡፡ የጠንካራ ፓርቲ መገለጫ በዋናነት የህዝብን ፍላጎት ማዳመጥና መተግበር መቻል ነው ይላሉ፡፡ የህዝብን ጥያቄ በአግባቡ መመለስ የቻለ ተቀባይነቱ እንደማያጠያይቅ ይገልፃሉ፡፡
የህዝብን ፍላጎት ለማርካት ራዕይ ያለው፣ ተልዕኮውን በትክክል ቀርፆ ለስኬት የበቃ ፓርቲ ማህበራዊ፣ ኢኮኖሚያዊና ፖለቲካዊ ለውጥ ለማምጣት እንደማይቸገር ዶክተር ሀብታሙ ያስገነዝባሉ፡፡ ይህም የጠንካራ ፓርቲ መገለጫ መሆኑን በማውሳት ፓርቲው ሁሉንም እኩል ሊያይ እንደሚገባ ያስረዳሉ፡፡ የህዝብን እኩል ተጠቃሚነት ማረጋገጥ እንደሚጠበቅበትም ያክላሉ፡፡
ያለዕውቀት አገርን መምራት አይቻልም፡፡ የፖለቲካ ፓርቲ የወደፊቱን የሚያስብ፣ ሊያጋጥሙ የሚችሉ ችግሮችን የሚገምቱና የሚያውቁ ተገቢውን ዕውቀት የጨበጡ አባላቶች ሊኖሩት ይገባል፡፡
እንደምሁራኑ ገለፃ፤ በህዝብ ዘንድ ተቀባይነትን ማግኘት፤ ትልቅ ራዕይን መሰነቅ፤ በህግና መመሪያ መመራት፤ ሁሉንም እኩል ሊጠቅም የሚችል ፖሊሲ ቀርፆ በስትራቴጂ በመመራት ለውጥ ማምጣት የጠንካራ ፓርቲ መገለጫዎች ናቸው፡፡

 

ዜና ሐተታ
ምህረት ሞገስ

Published in የእለቱ ዜና

በብሔራዊ ቤተመንግሥቱ በር ላይ በርካታ ጋዜጠኞች ይታያሉ፡፡ ሰዓቱ ገና 11፡00 ሰዓት ቢሆንም፣ ከግቢው በር አንስቶ የሚታዩት ግዙፍ ዛፎች በወቅቱ ከነበረው ደመና ጋር ተዳምረው አካባቢውን አጨልመውታል፡፡

ጥበቃዎች የጋዜጠኞች ስም እየጠየቁ በእጃቸው ከያዙት ወረቀት ላይ የተፃፈውን ስም ዝርዝር በማናበብ ማስገባት ቢጀምሩም፣ እንዳለመታደል ሆነና ስማችሁ ባለመኖሩ አትገቡም ከተባሉ ጋዜጠኞች መካከል ሆንን፡፡ ከብዙ የስልክ ግንኙነት በኋላ ለአንድ ሰዓት ደጅ ጠንተን ግብዣውን ለመቋደስ ተፈቀደልን፡፡
በቤተመንግሥቱ ሰፊ አዳራሽ የምግብ ብፌ ተደርድሯል፡፡ ከስር ነጭ ሸሚዝ ለብሰው ከላይ ጥቁር ኮት የደረቡት አስተናጋጆች የአፕል፣ የብርቱካንና የማንጎ እንዲሁም የተለያዩ የፍራፍሬ ጁሶችን ለተጋባዦች እያቀረቡ ናቸው፡፡
የሃይማኖት አባቶች፣ ታዋቂ ነባር የተፎካካሪ ፓርቲ አመራሮች፣ የበጎ አድራጎት ድርጅቶች ኃላፊዎች፣ የሲቪክ ማህበራት መሪዎች፣ ታዋቂ ደራሲያን እና የተለያዩ አርቲስቶች በአዳራሹ ታድመዋል፡፡ አንዳንዶቹ ቆመው አንዳንዶች ደግሞ ተቀምጠው ጁስ እየተጎነጩ በቡድን በቡድን ሆነው ይወያያሉ፡፡
ዋነኛው የመታደሚያ አዳራሽ ተከፈተናም ሁሉም ወደዚያው አመራ፡፡ የሚጠበቁት የኢፌዴሪ ጠቅላይ ሚኒስትር ዶክተር አብይ አህመድ በቦታው እስከሚደርሱም አንዳንድ የፖለቲካ ፓርቲ አመራሮችን ማነጋገር ጀመርን፡፡
ፖለቲከኛው ዶክተር መረራ ጉዲና «ከዚህ ቀደም ብዙ ዕድሎች አምልጠዋል፡፡ ንጉሡ ሲወርዱ፤ ደርግ ሲወርድ፤ የ1997ቱ የፖለቲካ እንቅስቃሴዎች በሙሉ ተፎካካሪ የፖለቲካ ፓርቲዎችን አምልጠዋል፡፡ ይህ የጠቅላይ ሚኒስትሩ ምርጫ አራተኛ ዕድል ነው፡፡» ካሉ በኋላ ይህኛውም ያመልጣል ያሚል ስጋት እንዳደረባቸው ገለጹልን፡፡
ጠቅላይ ሚኒስትሩ ዕድሉን ለመስጠት ዝግጁ መሆናቸውን በመጥቀስም፣ ስጋታቸው ኢህአዴግ ምን እያሰበ ነው? የሚለው ላይ መሆኑን ይናገራሉ፡፡ ኢህአዴግ ለለውጥ ተዘጋጅቷል? የሰፋ መድረክ፤ ለአንድ መቶ ሚሊዮን ሕዝብ የሚሆን ዴሞክራሲ አለው ወይ የሚለው? በአዕምሯቸው እንደሚመላለስ ያመለክታሉ፡፡
በፖለቲካው ውስጥ ለዓመታት ባደረጉት ተሳትፎ የሚታወቁት ፕሮፌሰር በየነ ጴጥሮስ «የፖለቲካ ፓርቲዎች ተንቀሳቅሰው ኃላፊነታቸውን እንዲወጡ በሕገመንግሥቱ የተቀመጡ መብቶች መከበር አለባቸው» ሲሉ ይገልጻሉ፡፡
«የኢህአዴግ ርዕዮተ ዓለም ሕገመንግሥቱን ማስፈፀም የሚያስችል አይደለም ያሉት ፕሮፌሰር በየነ፣ የመድብለ ፓርቲ ሥልጣንን ለፕሮፓጋንዳ ሳይሆን ፍትሃዊ በሆነ ምርጫ ሥልጣን ለማጋራት መዋል ያስፈልጋል ሲሉም ይገልጻሉ፡፡
«የኢህአዴግ ርዕዮተ አለሙ እስካልተለወጠ ድረስ የጠቅላይ ሚኒስትር ለውጥ ብቻውን ተፎካካሪ ፓርቲዎች ዕድሉን እንዲያገኙ አያስችልም፡፡» በማለት ዋነኛውና የሚፈቅደው አካል የኢህአዴግ ሥራ አስፈፃሚ ኮሚቴ መሆኑን ያስረዳሉ፡፡
በእራት ግብዣው ላይ የተገኙት የኢፌዴሪ ጠቅላይ ሚኒስትር ዶክተር አብይ አህመድ፤ አገሪቷ በቀጣይ የምታካሂደው አገራዊ ምርጫ ሕገመንግሥቱን በተከተለ መልኩ ከልብ ፍትሃዊ፣ ዴሞክራሲያዊና ነፃ እንዲሆን ፓርቲያቸው አስፈላጊውን ሁሉ እንደሚያደርግ አስታወቁ፡፡
ዴሞክራሲን ማስፈን አለመቻል ሃሳብ ከመለዋወጥ ይልቅ ጥይት ለመለዋወጥ መንስኤ ሆኖ ማለፉን የኢትዮጵያ ታሪክ እንደሚመሰክር ጠቅሰው፣ ከዚህ በኋላ ግን በመወያየትና በመደማመጥ ማመን እንደሚያስፈልግ ነው የገለጹት፡፡ «የዕውነት፣ የዕውቀትና የቀናነት ብቸኛው ባለቤት እኔ ነኝ፤ አገር ወዳድና ለአገር አሳቢ እኔ ብቻ የሚል አካሄድ ተቀባይነት አይኖረውም» ብለዋል፡፡
«ኢትዮጵያን ማስተዳደር ውስብስብና ከባድ ኃላፊነት ነው፡፡ የምንታገልላቸው ፓርቲዎች ከልባችን ብንወዳቸውም ሁሉንም ነገር በድርጅት መነፅር ብቻ እንይ ካልን አገራችንን እንጎዳለን» ያሉት ጠቅላይ ሚኒስትሩ፣ ሁሉም አገር ማስቀደምን አስመልክቶ ሊያስብ ይገባል ሲሉም ያሳስባሉ፡፡
«የሚያለያዩን ነገሮች ቢኖሩም የጋራ እሴቶቻችን ብዙ ናቸው» ያሉት ዶክተር አብይ፤ የታዋቂውን የነፃነት አርበኛ የኔልሰን ማንዴላን ሃሳብ በመጥቀስም «ሰዎች ጥላቻ የሚሰማቸው መጥላትን ተምረውት ነው፡፡ እናም ሰዎች ማፍቀርንም ከተማሩ አፍቃሪዎች ናቸው» ሲሉ አስገንዝበዋል፡፡ ይህ ሃሳብ በሁሉም ልብ ውስጥ መታተም እንዳለበትም ነው ያመለከቱት፡፡ «ትናንት ያለፈውን በመማሪያነት በመውሰድ የተሻለች አገር ለመገንባት በጋራ መስራት ይጠበቅብናል» ሲሉ ይገልጻሉ።
እንደ ጠቅላይ ሚኒስትሩ ገለጻ፤ የፖለቲካ ፓርቲዎች የሕዝብ ፍላጎት ማንፀባረቂያ ናቸው፡፡ ሕዝብንና መንግሥታዊ ሥልጣንን የሚያገናኙ ድልድዮች በመሆናቸውም በተለይም ፓርላሜንታዊ ሥርዓት ሊሳካ የሚችለው በፓርቲዎች ቀጥተኛና ሙሉ ተሳትፎ በመሆኑ ተሳትፏቸው የግድ ነው፡፡
«የዴሞክራሲ ሥርዓት ምሰሶ የሕግ የበላይነት፣ ሃሳብን በነፃነት የመግለፅ መብቶች ናቸው» ያሉት ዶክተር አብይ፤ ዴሞክራሲ አለ ከተባለ ዜጎች በአገራቸው ጉዳይ ላይ ውሳኔ ሲሰጥ በቀጥታም ሆነ በተዘዋዋሪ በተወካዮቻቸው አማካኝነት ድምፅ ሊኖራቸው ይገባል» ሲሉ ገልጸዋል፡፡ ለዚህም የተፎካካሪ ፓርቲዎች ተሳትፎ አስፈላጊ መሆኑንም በመጥቀስ፣ መንግሥት በዚህ በኩል ፅኑ ፍላጎት እንዳለውም አረጋግጠዋል፡፡


ዜና ሐተታ
ምህረት ሞገስ

 

 

Published in የእለቱ ዜና

አዲስ አበባ፡- የፌዴራል ጠቅላይ ዓቃቤ ህግ የመረጃ እጦትና የፍትህ መዘግየትን በመቅረፍ ጥራት ያለው፣ ቀልጣፋ፣ ተገማችና ተደራሽ የፍትህ ሥርዓት ለማስፈን የሚያስችል ብሄራዊ የተቀናጀ የመረጃ ሥርዓት ለመዘርጋት ከሦስት ኩባንያዎች ጋር ተስማማ፡፡
የፌዴራል ጠቅላይ ዓቃቤ ህግ ከትናንት በስቲያ ስምምነቱን የፈረመው ጨረታውን ካሸነፉት ኢሲክስ (ISYX) ቴክኖሎጂና አልረዋድ (ALROWAD) ኩባንያዎችና ከአገር በቀሉ አፍሪኮም ቴክኖሎጂጋር ነው።
ምክትል ጠቅላይ ዓቃቤ ህጓ ወይዘሮ መህቡባ አደም፤ ፕሮጀክቱ 14 ነጥብ ዘጠኝ ሚሊዮን ዶላር ወጪ እንደሚደረግበት፣ 28 ወራት እንደሚፈጅና ሙሉ ወጪው በኢትዮጵያ መንግሥት እንደሚሸፈን ጠቁመዋል፡፡ የኢንፎርሜሽን መረብ ደህንነት ኤጀንሲ ፕሮጀክቱን የማማከር ሥራ እንደሚያከናውንና ክፍያው በአፈጻጸሙ ልክ በየደረጃው እንደሚ ከናወንም ስምምነቱ በተደረገበት ወቅት ተናግረዋል፡፡
የተቀናጀ የፍትህ ሥርዓት መረጃ አያያዝ ባለመኖሩ የመረጃ እጦትና የፍትህ መዘግየት ችግሮች ሲፈጠሩ እንደነበር በማስታወስ፤ ፕሮጀክቱ ሲጠናቀቅ ጥራት ያለው፣ ቀልጣፋ፣ ተገማችና ተደራሽ የፍትህ ሥርዓት ለማስፈን እንደሚረዳም ገልጸዋል፡፡ በፍትህ አካላት ላይ ያለውን ጫና እንደሚቀንስ፣ በተገልጋዮች የሚነሳውን ቅሬታ እንደሚያስወግድና ከዕድገቱ ጋር እኩል ሊራመድ የሚያስችል የፍትህ ሥርዓት ለመዘርጋት እንደሚያስችልም ወይዘሮ መህቡባ ተናግረዋል፡፡
ሥርዓቱ ከፌዴራል እስከ ክልል ያሉትን ፖሊስ፣ዓቃቤ ህግ፣ፍርድ ቤቶችንና ከፍትህ ተቋማት ጋር ተያያዥነት ያላቸውን ተቋማት በማስተሳሰር አንድ አገራዊ የመረጃ ቋት እንደሚፈጥርም ነው የተናገሩት፡፡ይህም መረጃዎችን፣ሰነዶችንና ምስሎችን ፈጣን ልውውጦችን ለማድረግ ያስችላል ብለዋል፡፡
የአገር በቀሉ አፍሪኮም ኩባንያ ዋና ዳይሬክተር አቶ ባህሩ ዘይኑ፤ ኩባንያዎቹ በመካከለኛው ምስራቅ ብዙ የቴክኖሎጂ ሥራዎችን በመስራት ሰፊ ልምድ እንዳላቸው ተናግረዋል፡፡ ከእነርሱ ጋር መስራትም የዕውቀት ሽግግር ለማምጣት፣ የሥርዓቱን ቀጣይነት ለማረጋገጥና ለመደገፍ እንደሚያስችላቸው ጠቁመዋል፡፡ በተለያዩ የአገር ውስጥ ቋንቋዎች አገልግሎት እንዲሰጡ በማድረግ ቀላል አጠቃቀም እንደሚዘረጋም ገልጸዋል፡፡
ቴክኖሎጂው ህብረተሰቡ የወንጀል ድርጊቶችን ሲፈጸሙ ከተመለከተ በተንቀሳቃሽ ስልኩ አማካኝነት በመጠቆም የፍትህ ሥርዓቱን የሚያግዝበት አሰራር እንደሚዘረጋ በመጠቆምም፤ ቀልጣፋ፣ ግልጽና ተዓማኒነትን ያተረፈ የአገልግሎት አሰጣጥ እንደሚያሰፍንና በፍትህ ተቋማት መካከል ትስስር በመፍጠር የመረጃ ልውውጥን እንደሚያፋጥንም ገልጸዋል፡፡ አስተማማኝና ደህንነቱ የተጠበቀ የመረጃ ቋት እንደሚቀመጥ አቶ ባህሩ ጠቁመዋል፡፡
ሥራውን የሚያማክረው የኢንፎርሜሽን መረብ ደህንነት ኤጀንሲ ፕሮጀክት ማናጀር ኢንጂነር ረዳ ወልደ ብርሃን ፕሮጀክቱ አገራዊ ፋይዳውም የጎላ መሆኑን ተናግረዋል፡፡ የውጭ ኩባንያዎች መሳተፋቸው ለዕውቀት ሽግግር እንደሚረዳ ጠቁመዋል፡፡
አሳሳቢ የሆነውን የተሽከርካሪ አደጋ ለመቀነስ የትራፊክ ባለሙያዎች በተወሰኑ ሥፍራዎች የተሽከርካሪ ፍጥነት ቁጥጥር እያደረጉ እንደሚገኙ ያስታወሱት ኢንጂነር ረዳ፤ ሥርዓቱ ሲዘረጋ በአገር አቀፍ ደረጃ የሚሸፍን ሥራ ለመስራት እንደሚያስችል ጠቁመዋል፡፡
በየደረጃው የቁጥጥር ሥራ ይሰራል ያሉት ኢንጂነሩ በጥራት በኩል እንደማያሳስብ ገልጸዋል፡፡ ጨረታው ዓለም አቀፍ ሂደት ማለፉን፣ ለሦስት ወራት መቆየቱንና 30 የሚደርሱ ኩባንያዎች በጨረታው መሳተፋቸውን ገልጸዋል፡፡
የኢሲክስ (ISYX) ቴክኖሎጂ ምክትል ዳይሬክተሩ ሺቫ ካትሪሰንና የአልረዋድ (ALROWAD) ኩባንያ ዋና ዳይሬክተር ፓትሪክ ኦስታ ፕሮጀክቱ መረጃ ለማግኘት ይወጣ የነበረውን ጊዜና የሰው ጉልበት እንደሚቆጥብ ጠቁመዋል፡፡ ወንጀልን በመከላከልም ከፍተኛ ሚና እንዳለው ተናግረዋል፡፡ ፕሮጀክቱን አጠናቅቀው ከማስረከባቸው አስቀድሞም የሥራውን ቀጣይነት ለማረጋገጥ ለአገር በቀሉ አፍሪኮም ኩባንያ ባለሙያዎች ያላቸውን ሰፊ ልምድ በማጋራት በቂ የዕውቀት ሽግግር እንደሚያደርጉም ቃል ገብተዋል፡፡

 ዘላለም ግዛው
 


Published in የእለቱ ዜና

አዲስ አበባ:- የአዲስ አበባ ዩኒቨርሲቲ በ699 ሚሊዮን ብር የጥቁር አንበሳ ሆስፒታል የማስፋፊያ ግንባታ ለማከናወን ከዮቴክ ኮንስትራክሽንና ከኦቦን ቪያጅ አርክቴክቶችና መሐንዲሶች አማካሪ ድርጅት ጋር ትናንት ውል ተፈራርሟል፡፡ 

ከአዲስ አበባ ዩኒቨርሲቲ በኩል ስምምነቱን የፈረሙት ፕሬዚዳንቱ ፕሮፌሰር ጣሰው ወልደሃና በጥቁር አንበሳ ሆስፒታል የሚገነባው ማስፋፊያ 12 ፎቅና ሁለት ምድር ቤት ያለው ሕንፃ መሆኑን ተናግረዋል፡፡ ፕሮጀክቱ 699 ሚሊዮን ብር እንደሚወጣበትና በሁለት ዓመት ተኩል እንደሚጠናቀቅ፣ ወጪው ሙሉ በሙሉ በመንግሥት እንደሚሸፈን አመልክተዋል፡፡ ተቋራጩ በግልጽ ጨረታ መመረጡንም ገልጸዋል፡፡
ግንባታው ከአዲስ አበባ ከተማ አስተዳደር በተገኘ 13 ሄክታር መሬት ላይ እንደሚገነባ የጠቆሙት ፕሬዚዳንቱ፤ ሆስፒታሉ በርካታ ተገልጋዮችን የሚያስተናግድ በመሆኑ ከፍተኛ የቦታ እጥረት እንዳለበት አስታውሰዋል፡፡ ለዚህም የማስፋፊያ ግንባታው በፍጥነት እንዲጠናቀቅ ክትትል እንደሚደረግ ጠቁመዋል፡፡
የዮቴክ ኮንስትራክሽን ዋና ሥራ አስፈጻሚ አቶ ዮሐንስ ተክላይ፤ ተቋራጩ ደረጃ አንድ ፍቃድ ያገኘና በመንገድና በሕንፃ ግንባታ የተሰማራ መሆኑን ተናግረው፤ በተለያዩ ዩኒቨርሲቲዎች በርካታ ግንባታዎችን አጠናቅቆ ማስረከቡንና አሁንም ግንባታ ላይ ያሉ ፕሮጀክቶች እንዳሉት ገልጸዋል፡፡
አቶ ዮሐንስ፤ በ900 ቀናት ይጠናቀቃል ተብሎ የሚጠበቀው ይህ ፕሮጀክት በአሁኑ ወቅት ከውጭ ምንዛሬ ጋር ተያይዞ በከፍተኛ ሁኔታ ያጋጠመው የግንባታ ዕቃ ግብዓት አቅርቦት ችግር ግንባታውን እንዳያጓትተው ከሚመለከታቸው የመንግሥት አካላትና ከማህበራት ጋር በመነጋገር እየተንቀሳቀስን ነው ብለዋል፡፡ ችግሮቹም ወደፊት እንደሚቀረፉ ያላቸውን ተስፋም ተናግረዋል፡፡
ኦቦን ቪያጅ አርክቴክቶችና መሐንዲሶች አማካሪ ድርጅት ማኔጂንግ ዳይሬክተር ኢንጂነር አለሙ መረራ በበኩላቸው፤ የሚገነባው የተማሪዎች ማደሪያ ሕንፃ አራት ሺ ካሬ ሜትር ላይ ያርፋል፡፡ በድምሩ ሁለት ሺ አራት መቶ ተማሪዎችን የመያዝ አቅም ይኖረዋል፡፡ ጊቢው በማስፋፊያዎች በመጣበቡ በተገኘው የማስፋፊያ ቦታ ላይ ከሚገነቡት ሕንፃዎች አንዱ ሲሆን፤ የአስተዳደራዊ ሕንፃዎች፣ የተማሪዎች ማማከሪያና የጥናት ማዕከል በቀጣይ ይገነባል፡፡
67 ተቋራጮች በውድድሩ ተሳትፈው ዮቴክ ኮንስትራክሽን መመረጡ ታውቋል። ኢንጂነር አለሙ «ግንባታው የሰው ሕይወት የሚታደግበት ስፍራ በመሆኑ በልዩ ኃላፊነት ጥራቱ ተጠብቆ እንዲገነባ የበኩላችንን አስተዋጽኦ እንደርጋለን» ብለዋል፡፡
የጥቁር አንበሳ ሆስፒታልና የጤና ሳይንስ ኮሌጅ ዋና ሥራ አስኪያጅ ዶክተር ዳዊት ወንድማገኝ፤ የሆስፒታሉ ማስፋፊያ ሰፊ የህክምናና የትምህርት ተቋም መገንባት መሆኑን ተናግረዋል፡፡ «ወደፊት አስር የሚደርሱ ሆስፒታሎች ይገነቡበታል ብለን እናስባለን፣ ከሆስፒታሎቹ ጎን ለጎንም የአገልግሎት መስጫና መማሪያ ክፍሎች ይኖሩታል፡፡ ከፕሮጀክቱ መካከል አሁን የሚገነባው የተማሪዎች ማደሪያ ነው» ብለዋል፡፡ የተማሪዎችን ማደሪያ መሰራቱ ሆስፒታሉ በብዙ ግንባታዎች በመጣበቡ ጊቢ ውስጥ ያሉትን የተማሪ ማደሪያዎች በማዘዋወር ክፍሎቹን ወደ ህክምና አገልግሎት ለመለወጥ እንደሚያግዝም ገልጸዋል፡፡
የጥቁር አንበሳ ሆስፒታል ላለፉት 60 ዓመታት በህክምና ዘርፍ አገልግሎት እየሰጠ የሚገኝ ተቋም መሆኑ ይታወቃል፡፡ በአሁኑ ወቅት በዓመት 500 ሺ ሰዎችን የሚያስተናግደው ይህ ተቋም፤ ከተገልጋዮቹ መካከል 50 ሺ የድንገተኛ አገልግሎት ተጠቃሚዎች፣ 50 ሺ ደግሞ አልጋ ይዘው የሚታከሙ ናቸው፡፡ 70 በመቶ የህክምና አገልግሎት የሚሰጠው ለዝቅተኛ የኅብረተሰብ ክፍሎች ነው፡፡

ዘላለም ግዛው

 

Published in የእለቱ ዜና

ማህበራዊ ድረገፃችንን ይጎብኙ

 

የጎብኝዎች ብዛት

0002832138
TodayToday982
YesterdayYesterday778
This_WeekThis_Week9858
This_MonthThis_Month32318
All_DaysAll_Days2832138

       በኢትዮጵያ ውስጥ የተገነባው የመጀመሪያው ኦፐሬቲንግ ሲስተም ኢትዮኑክስ ስርጭት ላለፉት 8 ዓመታት (1999-2007 ..) በኢትዮጵያ ፕሬስ ድርጅት፣ በኢትዮጵያ ዜና አገልግሎት ላለፍት 2 ዓመታት እንዲሁም በኢትዮጵያ ገቢዎችና ጉምሩክ ባለሥልጣን ወርሃዊ ጋዜጣ ላይ ላለፈው 1 ዓመት በተግባር ተሞክሮ ሥራ ላይ ውሏል። ይህ ድረገጽ በኢትዮኑክስ ኦፐሬቲንግ ሲስተም ላይ ተገንብቶ የሚሰራ ነው።